Alimus rievtti dehálaččamus bargu lea ovdačovdosiid addin. Ovdačovdosiiguin stivrejuvvo eará láhkageavaheapmi.

Alimus riektái sáhttá váidalit, jos alimus riekti mieđiha váidalanlobi, hoavvarivttiid čovdosiin, muhtin dáhkádusrievtti čovdosiin sihke dain diggerievtti čovdosiin, main diggeriekti lea dahkan go lea doaibman eananriektin. Geahča maid Váidalanlohpeortnet.

Alimus riekti addá cealkámušaid dásseválddi presidentii árpmihanáššiin sihke vuoigatvuohtaministeriijai rihkusdahkkiid olgoriikkaide luobahanáššiin. Alimus riekti sáhttá addit cealkámušaid sierra muttu láhkaevttohusain. Dásseválddi presideanta sáhttá bivdit alimus rievttis cealkámuša riikkabeivviid dohkkehan lágain sihke Ålándda eanangoddebeivviid dohkkehan eanangoddelágain ovdal go son dohkkeha daid. Alimus riekti sáhttá maid iešdoaimmalaččat evttohit dásseválddi presidentii lága ásaheami dehe rievdadeami.

Alimus riekti sáhttá burgit duopmostuoluid loahpalaš dehege lágafámu ožžon duomuid riektegeavvangeavlli 31 kápihttalis máinnašuvvon ákkáiguin. Alimus riekti dutká muhtin riektegeavvanmeannudeami meattáhusain dahkkon guoddalusaid. Alimus riekti sáhttá muhtin dáhpáhusain máhcahit áššeoasálažžii dán massin mearreáiggi.